Romans 12
Si Gi Habi Mule Hita na Vure
1 aI mavonga, mua e huriki a turagu, a ngaru mu gu habi mule mua na Vure, ge manga a nihabi mahuri, a vuhuna a Vure i dodo hateka mua. Mu habi mule mua na Vure ge manga a nihabi malamala a Vure ge vivi vona. I kamumu mu gu rata mavonga, a vuhuna a Vure i kori hateka mua. 2Nahea mu gu laho manga a bakovi na malala. Mu takia a Vure ge pulo a niluhoi ne mua, mu gu lohoka vona a ningaru na Vure, lakea bara mu matakilaka vona a ningaru na Vure, a ra maki i kamumu, a ra maki i ngaru mu gu ratea.3 bA Vure i rata kamumu iau, i rata iau a apostolo vona. I mavonga, a taki mua, nahea tara viri ge luhoi ta ia a bakovi dagi hateka. Mua lobo mu pelekado mule mua, mua a bakovi navai, i ramai a hini a Vure i habi ne mua takutaku a hini mu gu luhoi tora navia e Kristo. 4 cA kakaine hita i tahoka a tabekena i kupo. A maka tabekena kakaine hita takutaku ri tahoka a leho legelege ne ria. 5I mavonga kunana a tara ne Kristo. Hita a tara ne Kristo, si ala kupo, pali si vatuhori. 6 dA Vure i rata kamumu hita, i habi ne hita takutaku a leho legelege. A ra leho i habi ne hita takutaku, si gi rata. A viri a Vure i habi a ngava vona, ge taki polo ne huriki ranga, ge muri mai a hini i luhoi torea a Vure, i dagi o i kiroko. 7E huriki a mari ni tuhori, ri gi tuhori e huriki. E huriki a mari ni tovo e huriki na Vure, ri gi tovo e huriki. 8E huriki a mari ni vara, ri gi vara e huriki. E huriki a mari ni habi, ri gi hatebalala. E huriki a mari ni muga ne huriki, ri gi habi a hatene ria na leho iea. E huriki a mari ni dodo, ri gi vivi ni kori e huriki.
Si Gi Ngaru Muholi e Huriki
9Mu ngaru e huriki, naha ni tamilalu ni ngaru ria. Mu marikoi a naro hale. Mu rata vakaroro a naro kamumu. 10 eMu vangaru ge manga a kabu i taku ri vangaru. Mu varangi ni vatogo. 11Naha ni made tavula. Mu habi a hatene mua ni ratea a leho ne Bakovi Dagi. 12 fMu vivi, a vuhuna mu pasimata ne Kristo. Mu hatenono na tahuna mu bole a maregoa. Mu vasileki vakaroro. 13 gE huriki a tara na Vure ri bala vona tara maki, mu tuhori ria. E huriki a mosi ri gi bele taho mua, mu matakari ria.14 hNaha ni ruduraha e huriki ri vakamadihi mua. Mu vakabagetu ria. 15Mu vivi turana e huriki ri vivi, mu tangi dodo turana e huriki ri tangi dodo. 16 iMu made na nivalemu. Naha ni rata polo muga muga, mu made kamumu turana e huriki a bakovi tavula. Naha ni bibi rike mule mua.
17 jNaha ni koli a naro hale. Mu rata a naro i kamumu na matane huriki lobo. 18Mu toni a bulune mua ni made na nivalemu turana e huriki lobo. 19 kMua e huriki a hategu, naha ni koli a naro hale. Mu davea a rongova na Vure ge koli, a vuhuna a ngava ni here puru na Hinere, i ta maea,
“E Bakovi Dagi i ta maea, ‘A nikoli, a leho nau kunana. Iau kikeri a viri bara koli a vilo hale ne huriki ri rata virihi mua vona.’”
20 lNaha ni koli. Mu rata manga a hini ni here puru na Hinere, i maea,
“Na tahuna a pile vomu i vitolo, o vakania.
Na tahuna i marohu, o habi a naru vona.
O rata mavonga, bara i maruhu.”
21Nahea a naro hale na pile vomu ge rangi ioe, go koli. O rangi a naro hale vona na naro kamumu vomu.
Copyright information for
BNP